منتديات ستار تايمز

⛔ مش عايز أرتبط - مش عناد بس عن وعي

مجدي كامل · 2025-05-15T08:25:38+00:00

صباح الفل،، هو إنت مستني إيه ؟ خد خطوة بقى ! هاتلنا عروسة نفرح بيك ! كلام بنسمعه كل يوم لما نكون عدينا العشرين وبنقرب من الثلاثين. أنا واقف كده بكل هدوء وبقول أنا مش عايز أرتبط، ولما حضرتك تندهش وتقول : ليه؟ بردو وأنا مبتسم هقولك : استهدى بالله واسمع مني بس. أنا دلوقتي في مرحلة بناء نفسي. يعني لسه بشتغل على مستقبلي وبحاول أفهم الدنيا قبل ما أفكر أضيف حد جديد على حياتي. إزاي أجيب حد يعيش معايا في الشقة العقلية دي ولسه الديكور الداخلي ما خلصش؟ تعال نحسبها مع بعض : شقة = نص عمر شبكة = تلاتة أرباع المرتب فرح = بيع الكِلية مهر = قسط العربية اللي ما اشتريتهاش يعني باختصار الارتباط حاليا بيحتاج تمويل خارجي أو فوز في اليانصيب وأنا بالعافية بلعب كوتشينة هههه وبعدين مش لازم كل واحد يعدّي ٢٥ يلاقي نفسه في قاعة أفراح. ليه لو ما ارتبطتش بعد سن معين الناس تبصلك كأنك ضيعت حياتك؟ أنا مش رافض الفكرة بس مش مستعجل أكون في علاقة علشان بس أرضي خالة سهير اللي شايفة إن الجواز حل كل مشاكل البشرية. نفسي أسافر نفسي أغيّر كريير نفسي أفتح مشروع أركب عجل أعيش شوية من غير ما يبقى ورايا حد بيقولي “جبت إيه النهاردة؟ ناقصين إيه؟ طب هتروح فين؟” يا ستي إديني مساحة أتنفّس بس. أنا في مرحلة لسه بفهم فيها طباعي وبكتشف عيوبي وإزاي بتصرف وقت ما أكون متضايق أو مضغوط. طب لو أنا مش فاهم نفسي، أجيب بني آدم تاني يعيش معايا ليه؟ وبعدين مش كل اللي مش مرتبط بيعاني. يعني إيه؟ يعني اللي مش مرتبط مش ناقصه حاجة ولا حزين ولا قاعد بيبكي في البلاكونة. أنا مستمتع بعزوبيتي براحتي بكوباية الشاي في هدوء من غير هو الشاي ده فيه سكر قد إيه؟ من الآخر،، أنا مش ضد الجواز بس ضد إني أعمل حاجة لمجرد إن الناس كلها بتعملها. أنا عايز أرتبط لما أحس إني جاهز مش لما الناس تقوللي كفاية كده. وعلى رأي المثل اللي لسه ما اتقالش: اللي يرتبط وهو مش مستعد، يا يدفع دم قلبه،، يا يحط قلبه في التلاجة 😄 تحياتي.