منتديات ستار تايمز

رواية مغربية بقلمي '' قهـر القلوب '' الجزء الثاني

أميرة على عرش الجمال · 2024-06-23T07:58:23+00:00

فاقت ملاك على صوت ماماها كاتفيقها رشيدة ( الأم ) : ملاك نوصي ابنتي دغيا راكي تعطلتي بزاف على الكلية. ملاك رمات المانطة وناضت بالزربة .. شافت تليفونها اللي كاتصوني فيه صاحبتها أسماء .. دخلات للدوش من بعد خرجت بدات تلبس حوايجها، هزات صاكها وكتوبتها وهبطت عند ماماها اللي كانت فالكوزينة كاتحط الفطور ملاك باست ماماها: صباح الخير ماما رشيدة: صباح الخير ابنتي ساعة وأنا كانفيقك .. الله يا بنتي مالكي على هاد النعاس كامل . ملاك هازة طرف دالحرشة وكاتعض فيه واقفة : غير البارح بقيت كانراجع حتا مشا الحال ودابا ماقدرتش نفيق رشيدة : وغير جلسي بعدا عاد فطري تعرفي غير الماكلة فين غادا . ملاك: صافي براكة عليا ا ماما خاصني نمشي را تعطلت وعاد أسماء ليوما تقتلني من قبايلا وهي تصوني.. ( باست ماماها بوسة فالهوا) : يالاه أنا مشيت رشيدة : الله معك ا بنتي نتعرفو شوية على بطلتنا على ما وصلت عند أسماء ملاك بنت شابة 20 سنة زوينة بزاف طويلة شوية وبشرتها بيضا وعينها رمادية شعرها طويل.. كاتقرا العام الثاني ف لافاك كاتقرا مزيان وعندها طموح كبير .. عايشة مع ماماها رشيدة السيدة المكافحة اللي من نهار مات راجلها أب ملاك وهي كاتقاتل على بنتها .. كاتخدم خياطة تبارك الله عليها عندها خدمة متقونة ولكن ماكاينش اللي يقدرها .. كادخل مصروف على قد الحال .. بدات تعيا ومرضها زاد عيياها .. واخا هاكاك باقا كاتقاتل على بنتها باش تقرا وتشوفها كيف بغات .. الأب ديال ملاك الله يرحمو كان تاجر كبير وعندو بزاف د المحلات ولكن نهار مات جا خوه وخدا كلشي دارو ب سميتو وخلاهم على الدص ماعندهم حتا حاجة من غير الدويرة اللي ساكنين فيها .. نرجعو للأحداث ملاك كانت لابسة سروال جينز وتريكو فالبيض وفوق منهم مونطو فالبني.. شعرها كانت جامعاه ذيل حصان ومخالية خصلات من القدام مطلوقين و لابسة حذاء شتوي فالبني .. وصلت عند أسماء اللي كانت كاتسناها حدا البلاكة د الطوبيس ملاك كاتنهج حيت جات كاتجري : السلام الزين ياكما تعطلت عليك أسماء دارت عندها معصبة : والله حتا حشومة عليك ا صاحبتي ساعة و أنا كانتسنا 2 طوبيسات دازو و أنا واقفة هنا كانتسناك .. و بزاف هادشي ملاك كاتحاول تهدنها .. : حقك عليا الزين .. را شفتيني جايا كانجري .. اختي داك البروجي راه غايحمقني الليل كامل و أنا معاه هو سبابي فهاد التعطيلة أسماء بنت زوينة سميمرة شوية وشعرها كحل قصير .. عينها بنيين و قصيرة شوية .. هي الصديقة المقربة د ملاك .. حنينة و نية وحلمها تلاقا بفارس أحلامها . و هما واقفين كايتسناو الطوبيس وأسماء كاتنگر .. دازت طوموبيل كحلة رانج روفر .. دازت بالجهد حتا ترش فيهم الما اللي كان فالشارع بسبب الشتا أسماء شهقت : ههئئئئ شنو هادشي واش ماكاتشوفش ملاك معصبة : اشهاد قلة الترابي بنادم غير عندو طوموبيل باغي يطير . وهما هاكاك كاينفضو حوايجهم حتا رجعت ديك الطومويبل وقفت حداهم و هبط الزاج أسماء بلا ماتهز راسها : هادي را سميتها قلة الحياء وقلت الاحترام واش سحابايك غير ع........ هزات عينها وماقدرتش تكمل الجملة .. قلبها ضرب بالجهد مللي شافت هاداك اللي كايطلل من الزاج د الطوموبيل .. كان شاب ثلاثيني بوكوص .. أسمر شوية شعرو كحل رطب و عندو لحية مطراسية أسماء تعثلمت : ا ا ا بغيت نقول باللي واقيلا ماشفتيناش .. (شافت فملاك) أه باينة ماغايكونش شافنا ياك . ملاك معصبة : كيفاش ماشافناش ؟؟! إذا ماكانش كايشوف يمشي يدير النضاضر دالشوف وبراكة من الطيران أسماء نغزتها : ويلي أ ملاك حشمي شوفي شكون راكب فيها راه ياسر البناني هادا ملاك باقا معصبة : يكون اللي بغا يكون .. ياسر حيد النضاضر كوحل وشاف فملاك بابتسامة جانبية : سمحيلنا ا آنسة را بصح ماشفتكمش أسماء بغات تلطف الجو : ماشي مشكل عادي عادي كاتوقع ياسر : باش نقدم اعتذاري أنا نوصلكم فين باغين تمشيو . ملاك حركت راسها : لا شكرا مامحتاجينش اللي يوصلنا ملاك زادت بحالها أما أسماء بقات غير كاتشوف فيه وكاتبتاسم : اه أنا موافقة توصلنا ركبت معاه أسماء وخلات موراها ملاك اللي مصدومة من تصرف صاحبتها .. بقات هاكاك حتا جا الطوبيس ركبات باش تمشي ل لافاك وصلت ملاك ولقات الحصة الأولى فاتت عليها دخلات ل المكتبة تسنا الحصة الثانية وهي معصبة بقات كتراجع فالمكتبة حتا وقفت عليها أسماء : انتي هنا وأنا من قبايلا كانقلب عليك ملاك شافت فيها وعاودت هبطات عينها بلا ما تجاوبها أسماء جرات كرسي وجلست حداها : وصافي ماتبقايش مقلقة عليا .. واش كاين شي وحدة يعرض عليها يااااسر البناني وترفض .. ما شفتيش شحال زوين ؟!! ملاك : إذا كان زوين را زوين لراسو .. دفعاتها وبغات تدوز: ودابا خليني نمشي راه الحصة غادي تبدا . أسماء.: غير بلا ماتعدبي راسك راه البروف ماجاش ملاك تأففت و بغات تمشي أسماء وقفاتها : وصافي ا صاحبتي بلا ماتبقاي مقلقة ملاك بعصبية : كيفاش مانتقلقش ونتي مخالياني وسط الشارع و راكبة مع برهوش عاجبو راسو ومابغيتينيش نتقلق أسماء : الصراحة عندك الحق مادرت فيها مايصلاح .. صافي ا لالة سمحيلي هادي آخر مرة ملاك : را بصح خاصها تكون آخر مرة ا أسماء .. والله ما كنتي عزيزة ما نسمح ليك أسماء بابتسامة : يخليلي الزين ملاك : وزيدي يالاه نرجعو بحالنا مللي البروف ماكاينش أسماء : أنا غادي يجي مورايا بابا باش نمشيو لعرس ولد خالي فالعروبية راكي عارفة ملاك : امممم نسيت .. صافي سيري نتشاوفو من بعد مشات أسماء من بعد ماتاصل بها باباها تخرج حدا باب الكلية و ملاك بقات كاتمشا فالشارع على مايدوز شي طاكسي حيت الطوبيس ماشي وقتها .. بدات تصب شتا خفيفة و ملاك باقا مالقات طاكسي و الطريق خاوية حتا وقف عليها بالطوموبيل .. اييه ياسر عاوتاني .. ملاك هزات عينها شافت فيه وكملات طريقها بلا ماتهضر معاه هو نزل و وقف مقابل معاها : زيدي نوصلك العنيدة را الطريق خاوية هنا و الجو مخسر هانتي تشوفي الشتا بدات أمل ربعت يدها وشافت فيه : واش شكيت عليك حيد من قدامي عافاك ياسر تاه فعينيها الرماديين و بقا غير كايبتاسم ملاك ارتابكت من نظراتو.. هبطت راسها وزادت، وهو خلاها على خاطرها ركب طوموبيلتو وزاد بقات ملاك هاكاك حتا بانولها واحد الجوج قاصدينها جايين جيهتها الشخص الأول : مال الزين كايتمشى بوحدو واقيلا خاصو اللي يونسو ملاك خافت ولكن مابغاتش تبين و بلا ماتهضر بدات تزرب فالمشية الشخص الثاني شدها من يديها و بدا يجر فيها : يالاه معانا را غادي يعجبك الحال ملاك بتوتر : طلق مني ماتقيسنيش بقا معاها كايجرها حتا ماعرف الضربة منين جاتو جا طايح فالأرض دارت ملاك بالزربة تشوف شكون هادا اللي ضرب داك الشخص و تما تفاجأت و هي كاترعد .. ... .. يتبع