كشفت الفنانة عزة بهاء، عن موقف غريب، وقع بعد وفاة زوجها، وهو ما صدمها يوم جنازته.
في هذا السياق، قالت عزة في برنامج "قعدة ستات" من تقديم مروة صبري عبر قناة "اليوم" إنها تزوجت 3 مرات، ووصفت حظها في الزواج بالسيئ لأن اختياراتها خاطئة، مضيفة "مليش حظ في الرجالة للآسف أنا بختار غلط".
وحكت عزة بهاء أنها اكتشفت بالصدفة أن زوجها متزوج عليها يوم جنازته، وقالت: "أنا كنت قاعدة مستنية جوزي كان مسافر وراجع واتأخر، لقيت مامته بتكلمني وقالتلي إنه توفى، مكنتش مستوعبة، نزلت وروحت لقيته أتوفى فعلا ولقيت في عربية الإسعاف معاه واحدة، فضلت أخبط على الباب عاوزة أعرف إيه حصل ومين معاه".
وتابعت: "بعد ما صلينا واتدفن واحد من أصحابه كان بيواسيني، فسألته مين اللي كانت معاه لأنهم قالولي إن كان معاه حد في الرحلة، قالي لأ متظلميهوش يا عزة هو طول عمره على خُلق دي مكنتش صاحبته دي كانت مراته".
وأوضحت عزة بهاء أنها كانت الزوجة الثانية لأن زوجها كانت متزوجا من سيدة أجنبية، وأنها اكتشفت زواجه من الثالثة يوم وفاته.
وكشفت عزة بهاء سبب غيابها وعدم مشاركتها في أعمال جديدة وقالت: "أنا ممثلة مش موديل؟ هل عمركم شفتوا عبلة كامل في مهرجان فني؟ كانوا زمان بيدعوني للمهرجانات الفنية ولكن غالبا دلوقت اتنسيت من كتر ما برفض لأني مبعملش شغل فهروح ليه؟ والتصوير على الريد كاربت مطلوب وبيفكر الناس بالنجوم، وممكن أجهز وأخلص لبس واجي على آخر دقايق أقول لا مش نازله ماليش مزاج، وأنا فاشلة في العلاقات العامة ومش بلاقي نفسي وسط الوسط الفني، ومش شبه الوسط الفني اللي موجود آخر 10 سنين".
يشار إلى أن آخر أعمال عزة بهاء مشاركتها في حكاية من حكايات مسلسل "إلا أنا" عام 2020.
