جيت نحكي حكايتي وماصرى بيا
سمعوا يا سامعين وحكمو عليا
راني مريضة ومرضي طول عليا
ماصبت أحد اللي حنين عليا
اه يا الصحة بكيتني من عينيا
راني حمل ثقيل وفشلوا ركابيا
يا ربي يا العالي ولطف بيا
شافيلي لضرار كثروا عدايا
عيني تشوف والناس تساوم فيا
شكون يخلف مكاني وزاد الضر عليا
طعامي قدامي وجاني بعيد عليا
مانكل مانشرب ونغلقوا البيبان عليا
اه يا الصحة كي اخطيتني أنتيا
كثروا حفاري وسابقوا بالفأس عليا
سعدي يقول
حقي نعاود حياتي ونعيش الرفاهية
الشرع دار أربعة مشي غير انتيا
ليام تجري والصبر ماهو واجب عليا
قلت كي طيح صحتي أنت تتهلا فيا
كما تهليت فيك وبلا مزيا
دار العام فجاتني وتخليت عليا
خاب ضني فيك ونكرة العشرة ليا
اه يا سعدي تكلمت كالبارود فيا
وقتلتني بالحياة وعجلت في الموت عليا
والله ماتربح مهما اعطاتك الدنيا
يجي نهار طيح فيه وتحمد ربي عليا
ماينفع ولد ولا اللي كان قريب اليا
اذا طاحت صحتي بسلامة عليا
طول عمري نخدم في الناس شكون بيا
وفي الاخير قعدة وحيدة برانية
يا اللي تعرف تبكي تبكي معيا
صحتي طاحت وهجروا لحباب عليا
اه يا الصحة كي خطيتني أنتيا
ظلام نهاري وحجب النور عليا
بقلم فاطمة الشلفية
