الجزء 4

كان كمال كيسوق كيمسح على جبينه وكيفكر في ماريا وفي المشاكل لي غارقة فيهم بسبب اسرتها لي كاتستغلها ومرض اختها وتعطيلة ديال زواجهم لي كان لازم يتزوجو هادي عامين ولكن اخ كمال تشد بسبب انه ضرب شي واحد ودخل للحبس والمصاريف بقات غادية غي عليه هو والطلوع والهبوط واخا هاكاك مفقذوش الأمل وقالو ربي عادي يفرجها داكشي علاش بقا خدام زوج خدمات باش يلاه يتكافا مع الدنيا.. وهو ساهي في حياته والتكرفيص ديالو لقا تلفونه كيصوني وكانت اخته رشا.. لي كانت كتقولو شنو محتاجين وبلي امه مريضة وخاصها الدوا المهم مصاريف أخرى غادي تتكب عليه من جديد..

وقف كمال باش تطلع معاه واحد السيدة.. كانت طويلة القامة ولابسة كسوة كلاسيكية أنيقة وباينة عليها لاباس عليها... من خلال كسوتها لي عبارة عن تنورة قصيرة في الأحمر في الكوير وفوغوع *fourrure * باينة عليه حقيقي ماشي مزيف.. كانت حاملة فوق راسها مظلة على الشتا لي كانت كتصب.. دايرة ماكياج تقيل وغوجاليف في الأحمر لي فات كيشوف فيها ومعجب بها.. طلعت وهي تشوف كمال لي مكانش مهتم بتفاصيلها ولا جمالها.. شاف فيها بآدب وهو حاط راسو وسولها على الوجهة ديالها.. اجابته وهي ذايبة في ملامحه الرجولية وحست بقلبها كيضرب وهي كتشوف في عينيه لي سحروها وكان باين بلي حنين واخا كيحاول يمثل بعينيه بلي قاسح ومغوبش ولكن هي كانت قوية وكتفهم مزيان صنف الرجال بصح هو سحرها بشكل غريب يمكن حيث معبرهاش ولا شاف في زينها كيما كيديرو كاع الرجال لي كتعرف حيث فعلا كانت نورا جميلة بزاف بحال شي عارضة أزياء شعرها اسود ودايرالو Les mèches وعينيها زورق وجمالها جمال ساحر وحاد ميمكنش ميسحركش من النظرة الأولى.... وكيفاش شخص بحال كمال ميشوفش فيها هيا لي مشطحة كاع الرجال.. استفزها ببروده داكشي لي خلاها متشوقة تعرفو وتحاول تهدر معاه.. طال الصمت وهو داير موسيقى للشاب عقيل وساهي كيفكن غي حبيبته والاغنية ديالهم المفضلة "،ديرولها العقل" *بلي نبغيها ومازال هي عمري.. راني معاها انا fidèl جامي changer.. كانو الكلمات حقيقة كيعبرو على قصه حبهم الافلاطونية.. ابتسم لبرهة وهو كيتفكرها الشي لي لاحظاتو السيدة لي معاه. قالت وهي مازال ساهية فيه:

ها انتا كتضحك وانا لي كنت نقول ماغاديش يحصلي الشرف نشوف ابتسامتك..

سكت لمدة ثواني واجاب : مكنبغيش نهدر مع الناس لي يطلعو معايا..

_ وعلاش ؟

- بكل بساطة علاش انهدر مع واحد السيد ولا سيدة وانا كتجمعني بيه مسافة طريق..

قربات لوذنيه باغراء وقالت:

يمكنلك متعتبرهاش مسافة طريق.. ونزيدو نطولوها..

~~~~~~~~~~~~

تصدم كمال من وقاحة نورا وحبس السيارة.. وهي ظنت انه عجبو الحال وغادي يتودد ليها ولكن خابت توقعاتها مين حل الباب وجا يهبطها بعصبيه وهو كازز على سنانو بغيظ:

هبطي!

تفاجأت بنبرة صوته ولكن مبغاتش تبين خوفها وبردت اعصابها وشافت فيه بملل:

مازال ما وصلت لفين باغية نمشي.. ونتا دير خدمتك هي الأهم

-مغاديش نوصلك.. وغادي تهبطي من الأحسن قبل ماغادي تسمعي مني كلام يوجعلك خاطرك..

شافت فيه ولمحت خاتمو لي في يده اليسرى. ابتسمت بتعب وهي كتشوف في هاد السيد الحمق لي منع فرصة يتمناها الف واحد من مدام نورا لي كلشي كيضربلها الف حساب.. هبطات وهي كتشوف فيه نظرات ماشي مفهومة وقالت :

بغيت تقول بلي انتا مخلص لحبيبتك.. يعلم الله هي واش مخلصة ولا لا!

زاد تعصب حيث وطاتلو على الوتر الحساس وشاف فيها بغيظ وشدلها يدها مزير عليها ونطق:

نتي دابا حاسبة راسك زوينة وكلشي يتمنى نظرة من عويناتك ولكن انا ماشي من هادوك لي غادي يتأثرو لمرا كتبيع راسها وفرحانة بلمة عباد الله عليها.. انا ماعمرني اعتبرت المرا أداة باش نخوي فيها كبتي ورجولتي انا كنعتبرها مرا عندها احساس وعندها قوة خاصها توظفها اما الزين ولا طاي بحال الا كتعرضي راسك في سوق المواشي(طلعها وهبطها باستفزاز) هادي انا راجل ومنتماهالكش..

لمعو عينيها بالدموع اول مرة كتسمع هاد الهدرة حسات راسها ديك اللحظة ساقطة ماعندها حتا شي قيمة.. هزات سبابتها بتهديد وقالت :

منسمحش لواحد بحالك يهيني .. انا راني مدام نورا المغفوري واش كاتعرف شكون نكون.. نقدر نشريك بيك بخطيبتك بالطاكسي ديالك..

ضحك بسخرية وقال : سبحان الله وعلاش واحدة بحالك. الآلة نورا تشوف واحد مسكين بحالي ماعندو لا حول ولا قوة.. ولا حيث عارفة راسك الا مكانش عندك. الفلوس مكان حتا واحد غادي يشوف فيك ولا يتمناك.. حيث بكل بساطة اي حاجة كاتشرى بالفلوس ما عندها قيمة.. وبما انك امرا قادرة وعندك بزاااف ديال السلطة والقوة من الأحسن توظفيها في طرق أخرى لي تفيدك ماشي في التخربيق..

طلع للقدام وهي باقية مبلوكية كتشوف فيه وقال :

طلعي نوصلك هاد الجهة مكيوصلوهاش التاكسيات ولكن مباغيش نسمع صوتك الله يخليك هادي خدمتي ونتي راكي ديريلي مشكل.

استسلمت للأمر الواقع وطلعت وهي غي كتشوف.. انكسرت من هدرتو وعرفات بلي عندو الصح هي دابا في عمرها 32 عام واي واحد كيشوفها كيطمع فيها على فلوسها وصافي.. اه هي فعلا زوينة ولكن فلوسها أجمل.. بقات كتشوف في الزجاج. وكتغمض عينيها وألف قصة وذكرى كتمر على بالها.. قاطع تفكيرها وهو كيخبرها انهم وصلو الوجهة.. خلصاتو بلا ما تشوف فيه ترددت بعض اللحظات والتفتت عندو قبل ما يمشي وقالت:

كتبغيها؟