خياطة فستان طفلة 

طريقه خياطه فستان طفله بخطوات مصوره وبسيطه

البترون

الحلو في هال الموديل انه عباره عن مستطيلات يعني ما يبا له خبره بس شوي رياضيات

مثل ما نشوف القياسات ،، والقياسات بالانش نشرح تقسيمات البترون

1. اولا خذي محيط قياس الصدر لبنتكا بنتي محيط الصدر عندها 20 انش

الحين نقص الطول 7 انش والعرض ،،، اقص 20 انش + 1.5

الزياده 1.5 ،،، اولا النص انش عشان لين تخيطين يكون عندج مجال حق الخياطه عسب تسكرين الاطراف وانش عشان ما يكون ضيق ممكن تزودين نص انش بعد اذا تخافين ما تضبطين القياس وانتي مبتدأة عشان ما يصير ضيق

2. نقص 4 مستطيلات بطول 11 انش وعرض 1.5 انش

3. نقص القطعه الرئيسيه من الفستان وهي تكون بعرض محيط الصدر مرتين

يعني محيط الصدر عند بنتي 20 انش فلازم اقص 40 انش للعرض اما الطول يعتمد على الي تبينه

طويل او قصير تحسبين من الصدر الين الطول الي تبينه وبيكون يمثل طول الفستان

الحين نبدأ بالخياطه

خذي القطعه رقم 3 واثنيها بحيث الجهه الصح من القماش تكون بالداخل نطابق الاطرف ونخيط على طول الخط

الحين ناخذ القطعه رقم 1 والي تمثل تدويره الصدر نفس الشي نطابق الجهتين بحيث الجهه الصح من القماش تكون للداخل

بتصير عندنا اسطوانه نثنيها من النص ونكويها يعني بيصير لما نثنيها الطول طبعا نفسه بس العرض بيكون النص لاننا ثنيناها من النص

نسوي هال الشي عشان لما نقوم بالخطوه الي بعدها يكون اسهل لنا اننا نثنيها بالاعتماد على الخص الي كويناه لانه يمثل النص

الحين نثني القطعه رقم 1 من النص من الجهتين نفس الصوره ونعتمد في الثني على خط الكوي

بعد ما نثنيها نكوي بعد عشان يسهل عليها الشغل في الخطوه الي بعدها

ثنينا القطعه رقم 1 من الجهتيه بعدين نسكرها نفس الي في الصوره يعني اول ثنينا الجهتين للداخل بعدين طبقناهم على بعض

باستخدام غرزة الzig zag شرحتها في درس سابق نسويها على القطعه رقم 3 ونسحب الخط لين يصير بقياس القطعه رقم 1

يعني نشد الخيط لين يصير عرض القطعه رقم 1 نفس عرض القطعه رقم 3

الحين باستخدام الدبابيس نحط القطعه رقم 3 بين ثنيت القطعه رقم 1 ونخيط على طول الخط يعني لما نخلص بتكون الكشكشه للقطعه 3 داخل

ثنيه القطعه رقم 1

الحين ناخذ القطع الاربعه الي تمثل شرايط العلاقي مال الفستان

نثنيها نفس ما سوينا في القطعه رقم 2 من النص اولا ونكوي بعدين نفتحها ونثني الجوانب من الطرفين بعدين نكويها بس هال المره

بنخيط على طول الطرف لما نثنيها ونسكرها فتصير عندنا 4 علاقيات

الحين وصلنا للخطوه النهائيه

وهي تثبيت العلاقات في الفستان نحسب وسط الفستان ومن الوسط نحسب من الامام 2.75 انش لليمن ونحط العلاقي الاول ونحسب 2.75 من اليسار ونحط العلاقي الثاني

اما من الخلف نحسب نفس الشي النص ونثبت العلاقي الثالث على يمين النص بمقدار 2.25 ونثبت العلاقي الرابع والاخير على

يسار النص بمقدار 2.25

نخيط على طول الخط عشان نثبتهم