السلام عليكم و رحمة الله تعالى وبركاته

هاني جيت و جبت معايا وصفة لذييييييييييذة جدا

درتها اليوم للغذاء و طلعات الذ ما يكون و حبيت نشاركها معكم،

و ياربي تجربوها

(( طجين بالبطاطس و لحم الدجاج و القشدة المنزلية))

الــــــمــــقـاديــر :

المقادير لي درت هي ل 2 د الاشخاص

لحم دجاج منطقة الصدر فاش كاينة الهبرة

2 حبات بطاطس مقشرة و مقطعة

بصلة كبيرة مقطعة طوليا

2 رؤوس ثوم محكوكين

الربيع مفروم

زيت المائدة مخلط بزيت الزيتون

و العطرية : ملح ، ابزار،خرقوم،سكين جبير،تحميرة،كمون

قشدة مصنوعة منزليا :كاس نيدو+كاس ماء+ملعقة طحين+ ملعقة صغيرة زبدة

فكسرونة نضع نيدو و الطحين و الماء و نحركوا مزيان فوق عافية مهيلة مع التحريك الدائم و بمجرد يتقال الخليط نطفيوا عليه

و نضيف الزبدة مع التحريك 

الــــطـريــقــة  :

فكسرونة نضع ماء مملح مع البطاطس و لحم الدجاج ثم فوق النار و نتركه يغلي لربع ساعة

فتلك الاثناء ناخذ المقلاة ،شوية دالزيت و نديروا البصلة تشحر مع الثوم و الربيع

و نغطيو المقلاة لان البخار كيخلي البصلة طلق الماء و بالتالي كتحتفظ بالبنة

ملي تشحر ناتي بالطجين، نديروا شوية د الزيت و نستفوا البصلة

بعد مرور ربع ساعة نزيل اللحم و نقطعوه بالشكل لي بيغنا ،طوليا او مكعبات او نفرتتوه

وفالمقلاة فاش شحرنا البصلة نشحروا اللحم فيه لدقيقة او 2 و نخليوها على جنب

بالنسبة للبطاطس،نمعكوها جيدا و نخلطوها بالقشدة لي وجدنا 2 او 3 معالق و نخلطوا مزيان

ندهنوا ايدينا بالزيت و نشكلوا كويرات من البطاطس و نستفوها فوق البصلة

ثم نوزعوا لحم الدجاج ،فالعطرية و شوية د الربيع

و فالاخير الباقي من القشدة نخففوها بالماء لي سلقنا فيه اللحم و البطاطس

و نمرقوا بيه الطاجين القياس لي يخلي الكل يطلق البنة ديالوا

نشعلوا على الطجين ،عافية مهيلة، ل 10 دقائق ، الى ان يتشرب الماء و تتقال المرقة

وهاهو الطجين،اش نقول ليكم بنيييييين خمسة و خميس عليا