أنا مش تمام ..

يعني مش في حالتي الطبيعة .. أقصد فيا حاجات متغيرة

مش حاسة إني بعيش حياة بحبها .. أنا عايشة وخلاص

رمضان والعيد فقدو كتير قوي من رصدهم عندي حتى عادات الدائمة اتغير جزء منها

الفرحه نفسها كانها جوة تلاجة .. باااااردة ..

يا فرحه طنط ظاظا فيا :)  حتى الكتابة حاسة إني مليش نفس أكتب

مشاعر ... عماله أدور عليها وبصراحة تاهت :)

لا أنا لاقية نفسي ولا عارفة احس أي حاجة من حواليا .. حقيقي فلة :)

مسلسل ايلي مبحبوش دة الزوجة التانية عتمان بيقول فية ( دا قتلني قتل وموتني موت ) نفسي أعرف أنا عملت في نفسي كدة لية

عاجبك يا هند تعملي كدة في نفسك طب شوفي نفسك قتيلة في عنيهم وموتي جوة نفسك يمكن الشعور بالعكس يعمل حاله طردية لنرفزة المشاعر

ههههههه ما علينا

طعم المر مع الوقت بيكون مفيد لانه بيمحي ذاكرة العسل أي والله بيعودك على حاجة واحدة وبيفصل الذاكرة عن محيط انهاردة

عايش ملك حزين وحيد ... أووو  راحه في الجون  ولا حد يجي يزعلك انت زعلان خلقة ولا حد يقدر ينغص  عليك حياتك أنت لوحدك مقتول جواها خمناشر مرة

يعني لما يبقى الحزن هو حجر الاساسي جواك بيكون عندك حصانه

ملك على عرش الدموع والقهر والذي منه

الخلاصة .. لو عاوز تعرف نفسك وسع مقاس الحزن جواك  حتعرف تشوف عيوبك بشكل اوضح يمكن تقدر تعدلها بعيوب أجمل

جنون صباحي :) مواكب الراحلين