زجل ... شكون انت....
شكون انت يا المݣفض
رجليك على الشتا
ما راضي بالعيش
كي رضى خط النون بالنقطة
منك شتا يا المعوض
الخير ب الرتا. (العقدة الشديدة )
معاكس الدرويش
كي عكسات
الكرش في القبطة
تنفختي حتا تعض
اللسان بالشمتة
حسبتينا نمل بالنيش
عفطتي والرجل
كملات العفطة
جيتي بغتا والحظ
زريعتو ليك منبتة
ربّٓا جناحك الريش
نقزتي و فتي لهيه الݣلتة
لا تنساش وقت الحزة
لا تخلط الحق مع الطيش
وتحطو فوق راسك دزة
خليك من الفشوش والفيش
كون كي عود الرندة
الى جا ف الفم ينعش
ويعطي ريحة معودة
تواضع وخليك درويش
راه الالف فوقو همزة
عمرو ما تحنى فالخيش
ولا سال من جرحو نقطة
ياك الصاد صبرو هشيش
يعافر ويكابر مزير السمطة
وانت صادك ولف تخوفيش
صغار وسار من لحروف الملݣطة
طول صباع ايديه فالنبيش
وسرق من النوم النقطة
رجع ضد ضاسر هيش
يضرب ويعض وزاد في الغلطة
