طب بما انه خلاص رمضان فاضل عليه ساعات ... خلوني اتكلم شوية عن مسلسل مختلف عليه و هو جولة اخيرة
نبدأ بالتقييمات السريعة
القصة 6 \ 10
السيناريو 4.5 \ 10
الحوار 6.5 \ 10
الأداء التمثيلي 7.5 \ 10
الموسيقى التصويرية 9 \ 10
الاخراج 8.5 \ 10
المسلسل من يوم أعلن عنه وانا كنت متفائل فيه لسبب غير معلوم لكن كنت منتظره مخرجة اسمها يحترم رغم قلة أعمالها بشكل صارخ و ممثل لايزال واحد من اكتر الناس اللي ترعرت فنيا على أفلامه و ممثل كوميدي يحترم بيغير جلده و قصة معقولة رغم أنها مستهلكة
الصراحة و الأمانة تحتم علي اني احكم على المسلسل بسلبيات كثيرة لكن احس اني هكون ظالم شوية
المسلسل على مستوى بناء الأحداث و السيناريو بطئ لأقصى درجة بالذات اول 5 حلقات ، غير المحاولات اللي بعضها جاب و بعضها لا في ان المسلسل يكون فلسفي و درامي و اللي زي ماقلت بعضها كان فعلا مقبول للمشاهدة و ماتحسسك بأفورة و ممكن تخليك تتفاعل معاها ، لكن المشكلة كانت ان تقريبا كتاب المسلسل ركزوا على الجانب الدرامي و نسوا فكرة الMMA ولا كأنها موجودة اللي هو انت لو شلت الMMA و حطيت مكانها تنس الطاولة او كرة الشاطئ حتى ... الأحداث هتمشي عادي جدا من غير اختلاف ، ثم اصلا فكرة الام ام ايه دي معربة بالكامل لان من امتى فمصر فيه اتحادات Fighting و مسابقات و كده يعني الكلام ده غير موجود الا بنسبة قليلة جدا فالمجتمعات الحلوة و سكان Egypt و حتى بشكل هاوي مش رسمي مثلا بس عديها ، ده غير التعامل مع الموضوع بعبط شديد و حتى لما اشرف عبد الباقي يروح للسقا و هو طلعان ايماناته من الضرب و المفروض يقوله شئ مهم او اسم حركة تنهي الماتش لصالحه او حتى تكنيكات و ملاحظات محنكة من اللي المفروض هو كمدرب مخضرم يساعد بيها بنستغني عن كل ده و نكتفي ب"ركز على وشه و ايده الشمال طارشة" و كده المفروض السقا يسمع الكلمتين الهبل دول و ينزل يقتل اللي قدامه و Guess What ده بيحصل فعلا فمفيش اي مجهود اتبذل او حتى المؤلفين شافولهم ماتشين على بعض يفهموا اللعبة مثلا و كده كده هو المسلسل درامي و جانب الfighting ده أقل اهتمامته ده لمن يبحث عن الfighting ، الجانب الدرامي اتعمل منه افكار كويسة لكن كلها اهدرت او اتنفذت بشكل ضعيف
فكرة السقا و انه بدأ يورث الزهايمر من ابوه فنفس الوقت اللي رجع يلعب فيه و اختبار انه اما يكمل لعب و ينسى اما يخسر كل شيء كانت الخط الوحيد الدرامي اللي اتنفذ كويس فيما عدا ذلك فكله بالضياع
خط تامبي او اشرف عبد الباقي اللي كانت برضه ممكن يطلع منها افكار كتير كويسة لكنها اهدرت بالآخر و محاولة ربطه بخط السقا ففكرة ابنه او بنته الغضبانين عليهم كانت تعبانة و الخط ككل انتهى بشكل تعبان
خط شبكة او علي صبحي وهو مفيش عليه كلام كتير غير محاولة ربطه بخط اسماء ابو اليزيد او بمعنى أصح بنت اسماء ابو اليزيد
خط اسماء ابو اليزيد المبالغ فيه و الافورة الدرامية و ربط الأحداث ببعضها برضه و دي بالمناسبة مشكلة فالمسلسل انه بيحزق عشان يربط الشخصيات و خيوطهم كلها ببعض ، و المشكلة انه على اخر المسلسل لما مش بيلاقي فايدة من ربط الشخصيات ببعض بيروح مكنسل الفكرة ولا كأنها اكتملت و ده اللي حصل فخطها و خط أمهات شبكة
خط ابو السقا او رشدي الشامي و محاولة الحزق المستمر لإثبات انه عنده زهايمر فمرة يتحرش بالممرضة مرة يفكر انه فيه زلزال مرة يقلع بنطلونه و يمشي بالشارع ... اللي هو بص الراجل التعبان فدماغه اللي عنده زهايمر بيعمل ايه !!
فاجمالا كان فيه افكار كتير و لكن كلها اترمت بالزبالة فالاخر
الاداءات التمثيلية كانت قوية من الكل حتى السقا اللي كان اداءه بارد طول المسلسل عمل كم مشهد حلو بأخر حلقتين ، اشرف عبد الباقي كان ممتاز فتغيير جلده و عمل اللي لا يجرؤ كثير من جيله على عمله و يستحق الإشادة ، البنت اللي عاملة دور بنت السقا احسن شئ فادائها انه طبيعي و سلس مش مفتعل رغم اني مفهمتش هي مراهقة ولا طفلة لان البنت نفسها مراهقة لكن المسلسل مش موضح تماما هيا من انهي نوع لكن عامة ادائها كان جميل ولو استمرت بتكون شئ محترم ، رشدي الشامي و علي صبحي و الاتنين شهادتي فيهم مجروحة .... الاول لأني عمري ما شفته بشخصية الا و عمل احسن مافيها و هو اللي كان مصبرني على عبط كتابة شخصيته و الثاني لأنه شاطر و مجتهد و قبل كل ده هو ابن منطقتي الكريمة "عين شمس"
الاخراج لا غبار عليه .... مجهود يحترم من المخرجة اللي تقريبا شالت المسلسل على كتفها و طارت بيه لأماكن كان صعب يوصلها لولاها "او لولا مخرج محترم ايا كان" و ممكن اعتبره النسخة المحسنة من "بطن الحوت"
و طبعا بالاخر shout-out بعرض السما و الأرض لخالد الكمار على الموسيقى المبهرة
المسلسل إجمالا يتشاف لكنه مش ممتاز و السيناريو محتاج سيناريو
تقييم عام 7 / 10
