بكل صراحة، أشرف حكيمي هو اللاعب الإفريقي الوحيد اللي كيستاهل الكرة الذهبية هاد العام، وبل أكثر من هكا، راه كيستاهل حتى يكون مرشح قوي للكرة الذهبية العالمية. المستوى اللي دار هاد الموسم مع باريس سان جيرمان كان خيالي، استقرار، حضور ذهني، قوة بدنية، وأداء هجومي ودفاعي من أعلى طراز.

راه قليل تشوف ظهير فالعالم عندو هاد التأثير فكل دقيقة كيلعبها، وهادشي ماشي جديد عليه، ولكن هاد العام بان الفرق الكبير حتى بالمقارنة مع النجوم العالميين.

أما بخصوص براهيم دياز، فبصراحة الأمور ما كتمشيش فصالحو بالشكل اللي كان كيتمنى. رغم أنه لاعب موهوب وعندو لمسات مهمة، إلا أن الاستمرارية ديالو ضعيفة، وحتى الثقة اللي مفروض يلقاها من المدربين ما جاتش بالشكل الكافي. لا أنشيلوتي فريال مدريد عطاه دور أساسي، ولا حتى تشابي ألونسو اعتمد عليه، وهذا كيخلينا نتساءلو واش فعلا كينقصو شيء من الالتزام أو التركيز؟

فريق بحال ريال مدريد كيحتاج لاعبين جاهزين ذهنيًا وبدنيًا طول الموسم، وبراهيم، رغم الموهبة، باقي خاصو يثبت أنه قادر يكون ضمن هاد المستوى العالي بشكل دائم. الفرق كبير بين حكيمي اللي كيأكل الأرض بنفس المستوى طول الموسم، وبين براهيم اللي ما زال كيتخبط فالتبات والتقة ديال المدربين.